اسرائیل کے شام میں مزید 60 فضائی حملے، جانی و مالی نقصان کا خدشہ

دمشق( مانیٹرنگ ڈیسک)اسرائیل کے شام میں فضائی حملوں میں جانی و مالی نقصان کا خدشہ ہے۔غیر ملکی میڈیا رپورٹس کے مطابق اسرائیلی فوج نے پانچ گھنٹوں کے دوران شام میں 61 میزائل داغے، صیہونی فورسز نے دمشق میں فورتھ ڈویژن کے ہیڈ کوارٹر اور قریبی علاقوں میں بمباری کی، فضائی حملوں میں ریڈار سسٹم اور فوجی اسلحہ ڈپو تباہ ہوگئے۔اسرائیل کی شام میں کارروائیوں پر شام کی عبوری حکومت نے ردعمل میں کہا ہے کہ اقوام متحدہ اسرائیل کو شام میں کارروائیاں کرنے سے روکے، اسرائیل کو ہماری سرزمین سے اپنی فوج فوری طور پر واپس بلانی چاہیے، اور شام پر اسرائیلی حملوں کو بھی فوری طور پر بند کرنا چاہیے۔ادھر شام کی صورتحال پر اردن میں عرب لیگ کا ہنگامی اجلاس ہوا، جس میں شرکا کی جانب سے شام میں اسرائیلی دراندازی کی مذمت کی گئی۔عرب لیگ کے اجلاس کے اعلامیہ میں کہا گیا کہ اسرائیلی حملے علاقائی امن و سلامتی کے لیے خطرہ ہیں، عالمی برادری اسرائیل کو مقبوضہ شامی علاقوں سے متعلق قراردادوں پر عملدرآمد کا پابند بنائے، اور شامی عوام کو تمام ضروری مدد فراہم کرے، شام کی تعمیر نو کے لیے اقدامات اور مدد بھی فراہم کرے۔