سکیورٹی خدشات کی بنا پر کوئٹہ میں موبائل فون سروس بندہوئے تیسرا روزبھی گزر گیا

کو ئٹہ ( اباسین خبر)بلوچستان میں جعفر ایکسپریس پر حملے کے بعد سے کوئٹہ سے ٹرین سروس تاحال معطل ہے جبکہ شہر میں انٹرنیٹ کی بندش کا آج تیسرا دن ہے۔ سکیورٹی خدشات کی بنا پر کوئٹہ میں موبائل فون سروس بھی بند کر دی گئی ہے جس سے شہریوں کو مشکلات کا سامنا ہے۔اس کے علاوہ، کوئٹہ میں ریڈ زون کو سیل کر دیا گیا ہے اور سکیورٹی کے پیش نظر راستوں میں کنٹینرز لگا کر رکاوٹیں پیدا کی گئی ہیں۔ یوم علی کے مرکزی جلوس کے حوالے سے بھی سکیورٹی کے سخت انتظامات کیے گئے ہیں، اور جلوس کے روٹ پر مغرب سے قبل دکانیں اور مارکیٹیں بند کر دی جائیں گی۔ریلوے حکام کا کہنا ہے کہ جعفر ایکسپریس کے متاثرہ بوگیوں کی مرمت مکمل کر لی گئی ہے، تاہم ٹرین سروس کی بحالی کے لیے سکیورٹی کلیئرنس کا انتظار کیا جا رہا ہے۔ اس دوران چمن پیسنجر ٹرین معمول کے مطابق چل رہی ہے۔