بیرسٹر سیف کا پنجاب کے اشتہاری بجٹ کی تحقیقات کا مطالبہ

پشاور( اباسین خبر)مشیر اطلاعات خیبر پختونخوا، بیرسٹر ڈاکٹر محمد علی سیف نے پنجاب کے اشتہاری بجٹ کی تحقیقات کا مطالبہ کرتے ہوئے کہا کہ غریب عوام کا پیسہ اشتہارات پر خرچ کیا جا رہا ہے، جو کہ سپریم کورٹ کے فیصلے کی خلاف ورزی ہے۔ انہوں نے سوال کیا کہ کیا پنجاب میں مہنگائی اور بے روزگاری ختم ہو چکی ہے، اور کس کارکردگی کی تشہیر کی جا رہی ہے؟سیف نے مزید کہا کہ پییکا (پیکا ایکٹ) کے کالے قانون کے تحت عوام کے ٹیکسوں کے پیسے سے اخبارات میں اشتہارات کی بھرمار ہو گئی ہے، جہاں اب خبریں نہیں بلکہ اشتہارات شائع ہوتے ہیں۔ انہوں نے مطالبہ کیا کہ یہ تحقیقات کی جائیں کہ سرکاری پیسہ کیوں لٹایا جا رہا ہے اور ذمہ داروں سے یہ پیسہ واپس لے کر قومی خزانے میں جمع کیا جائے۔بیرسٹر ڈاکٹر سیف نے پنجاب اور سندھ کی غیر منتخب حکومتوں پر بھی تنقید کی، جن کی کارکردگی کو اشتہاری ڈرامہ بازی تک محدود قرار دیا اور کہا کہ عوام نے نہ تو ان کی کارکردگی کو دیکھا ہے اور نہ محسوس کیا ہے۔ انہوں نے مریم نواز شریف کی سرکاری پروموشن کو مزاحیہ اشتہار قرار دیتے ہوئے کہا کہ عوام کے پیسے سے دو غیر سیاسی افراد کو لیڈر بنانے کی کوشش بدقسمتی ہے۔انہوں نے یہ بھی کہا کہ اگر چھبیسویں ترمیم نہ کی جاتی، تو شاید عدلیہ اس لوٹ مار اور حکم کی خلاف ورزی کا نوٹس لے لیتی۔