جادو ٹونے سے حکومت چلانے والوں کا وقت گزر چکا ہے: عظمیٰ بخاری

لاہور( اباسین خبر)وزیر اطلاعات پنجاب عظمی بخاری نے کہا ہے کہ جادو ٹونے سے حکومت چلانے والوں کا وقت گزر چکا ہے۔اپنے بیان میں صوبائی وزیر عظمی بخاری کا کہنا تھا کہ پنجاب حکومت نے عوامی خدمات کے ریکارڈ قائم کرنے کا پہلا سال مکمل کیا ہے اور عوامی توقعات پر پورا اترتے ہوئے مسلم لیگ (ن) نے اپنے وعدوں کو حقیقت کا روپ دیا ہے۔انہوں نے مزید کہا کہ خیالی پلا پکانے اور جادو ٹونے سے حکومت چلانے والوں کا وقت ختم ہو چکا ہے، اب نوازشریف کا دور ہے، جو عوامی خدمت اور ترقی کا دور ہے۔ مریم نواز نے اپنے ایک سال کے عرصے میں وہ تاریخ ساز کام کیے ہیں جو پہلے کوئی حکومت نہیں کر سکی۔ مریم نواز نے پاکستان کی سیاست کے پیمانے کو یکسر تبدیل کر دیا ہے۔عظمی بخاری نے یہ بھی کہا کہ پنجاب کے عوام نے مریم نواز کو جو مینڈیٹ دیا ہے، اس کے بدلے مریم نواز پنجاب کو ترقی یافتہ بنانے میں مصروف ہیں۔ انہوں نے گڈ گورننس، میرٹ اور شفافیت کو اپنا اصول بنایا ہے۔صوبائی وزیر کا کہنا تھا کہ اب فتنے، فساد اور انتشار کی سیاست کو دفن کر دیا گیا ہے، اور اب صرف کام ہو گا۔ باقی صوبوں کے ترجمانوں کو بھی ہمت کرنی چاہیے اور اپنے وزرااعلی کی کارکردگی قوم کے سامنے پیش کرنی چاہیے۔