گورنر پنجاب سے اطالوی سفیر کی ملاقات، ماحولیاتی آلودگی و تجارت پر تبادلہ خیال

لاہور( اباسین خبر)گورنر پنجاب سردار سلیم حیدر خان سے پاکستان میں اٹلی کی سفیر میری لینا ارمیملن نے ملاقات کی، جس میں ماحولیاتی آلودگی، تجارت، اور خاص طور پر زیتون کے حوالے سے تفصیلی گفتگو کی گئی۔گورنر ہاس لاہور میں ہونے والی ملاقات میں گورنر نے اطالوی حکومت کا شکریہ ادا کیا، جس نے پاکستانی طلبہ کو ایک ہزار ووکیشنل سکالرشپس دینے کا اعلان کیا۔گورنر پنجاب کا کہنا تھا کہ اٹلی میں مقیم پاکستانی معیشت میں اہم کردار ادا کر رہے ہیں اور زیادہ پاکستانی اٹلی جانا پسند کرتے ہیں۔ تاہم، انہوں نے کہا کہ حالیہ برسوں میں انسانی سمگلروں کے ہاتھوں پاکستانیوں کو غیر قانونی طریقے سے بیرون ملک بھیجے جانے کے واقعات میں اضافہ ہوا ہے، اور اس سلسلے میں پاکستان میں سخت اقدامات کیے گئے ہیں۔ انہوں نے اطالوی سفیر سے درخواست کی کہ اٹلی کی حکومت امیگریشن قوانین میں نرمی پیدا کر کے پاکستانیوں کو قانونی طریقے سے موقع فراہم کرے تاکہ ایسے حادثات سے بچا جا سکے۔گورنر نے مزید کہا کہ اٹلی پاکستان سے زیتون درآمد کر کے زیتون کے تیل کی صنعت میں بہتری لا سکتا ہے۔ “میڈ ان پاکستان” زیتون کا تیل مارکیٹ میں آنا شروع ہو چکا ہے اور اٹلی کی ٹیکنالوجی کی مدد سے یہ مزید بہتر ہو سکتا ہے۔انہوں نے کہا کہ پاکستان اور اٹلی کے درمیان کاروباری وفود کا تبادلہ ضروری ہے، اور ماحولیاتی آلودگی کو کم کرنے کے لیے پنجاب حکومت نے الیکٹرک بسوں کا آغاز کیا ہے، جو فضائی آلودگی کو کم کرنے میں مددگار ثابت ہوں گی۔