گورنر خیبرپختونخوا کی ارباب نیاز سٹیڈیم کے نام کی تبدیلی پر سخت تنقید

پشاور( اباسین خبر)گورنر خیبرپختونخوا فیصل کریم کنڈی نے ارباب نیاز سٹیڈیم کے نام کی تبدیلی پر صوبائی حکومت کو سخت تنقید کا نشانہ بنایا۔اپنے بیان میں گورنر نے کہا کہ ارباب نیاز سٹیڈیم کا نام تبدیل کرنا ایک غیر مناسب اقدام ہے، کیونکہ اس کا نام دہشت گردوں کو سپورٹ کرنے والے شخص کے نام پر رکھنا پختونوں کے زخموں پر نمک پاشی ہے۔ انہوں نے وزیر اعلی پر الزام عائد کیا کہ وہ صوبے کی شناخت کو مٹانے اور اس کی تباہی کے لیے کام کر رہے ہیں۔فیصل کریم کنڈی نے مزید کہا کہ سانحہ 9 مئی کے مرکزی کردار کے نام پر سٹیڈیم کا نام رکھنا ریاست دشمن قوتوں کو طاقت فراہم کرنے کے مترادف ہے۔ گورنر نے اس بات کا بھی اعلان کیا کہ وہ ارباب نیاز سٹیڈیم کے نام کی تبدیلی کے خلاف پشاور کے عوام کے ساتھ کھڑے ہیں۔انہوں نے یہ بھی کہا کہ گزشتہ 9 سالوں سے اقتدار میں موجود جماعت ارباب نیاز سٹیڈیم کی بحالی اور تزئین و آرائش میں ناکام رہی ہے، جبکہ وفاقی حکومت اور پی سی بی نے لاہور اور کراچی کے سٹیڈیمز کو چند ہفتوں میں مثالی بنا دیا۔