حکومت نے بجلی 10 روپے فی یونٹ تک سستی کرنے کا منصوبہ تیار کرلیا

اسلام آباد( کامرس ڈیسک)حکومت نے عوام کو بجلی کے بلوں میں سہولت دینے کے لیے 8 سے 10 روپے فی یونٹ تک بجلی سستی کرنے کا منصوبہ تیار کرلیا ہے۔ذرائع کے مطابق اس منصوبے کے تحت حکومت گردشی قرضوں کے حجم کو کم کرکے بجلی کی قیمتوں میں کمی کرے گی۔ اس مقصد کے لیے قرضوں کی ادائیگی میں 1.3 کھرب روپے کی کمی سے گنجائش پیدا کی جائے گی اور اس مالی گنجائش کو بجلی کی قیمت میں کمی کے لیے استعمال کیا جائے گا۔اس منصوبے کے ذریعے بجلی کے شعبے میں جاری مالی نقصانات کو کم کرنے کی کوشش کی جائے گی۔ ذرائع نے مزید بتایا کہ آئی ایم ایف کا جائزہ مشن اگلے ماہ کے آغاز میں پاکستان کا دورہ کرے گا اور اس دورے کے دوران حکومتی منصوبہ آئی ایم ایف مشن کے سامنے رکھا جائے گا۔واضح رہے کہ آئی ایم ایف نے پہلے ہی بجلی کی قیمتوں میں کمی کے لیے ٹیکسوں میں کمی کے حکومتی منصوبے کو مسترد کر دیا تھا، تاہم حکومتی منصوبے کے تحت بنیادی ٹیرف میں 8 سے 10 روپے فی یونٹ تک کمی کی جائے گی۔