بروقت بلدیاتی انتخابات کا انعقاد صوبائی حکومتوں کی ذمہ داری ہے: الیکشن کمیشن

اسلام آباد( اباسین خبر)الیکشن کمیشن نے کہا ہے کہ بروقت بلدیاتی انتخابات کا انعقاد صوبائی حکومتوں کی ذمہ داری ہے۔الیکشن کمیشن نے پنجاب کے بلدیاتی انتخابات سے متعلق ان چیمبر سماعت کا اعلامیہ جاری کردیا۔اعلامیہ کے مطابق چیف الیکشن کمشنر سکندر سلطان راجہ کی سربراہی میں الیکشن کمیشن کے فل بنچ نے پنجاب کے بلدیاتی انتخابات کیس کی سماعت کی، جس میں چیف سیکرٹری اور سیکرٹری لوکل گورنمنٹ پنجاب بھی پیش ہوئے۔چیف الیکشن کمشنر سکندر سلطان راجہ نے کہا کہ آئین کے تحت الیکشن کمیشن وفاق اور صوبوں میں بلدیاتی انتخابات کروانے کا پابند ہے، تاہم بدقسمتی سے کوئی بھی صوبائی حکومت بلدیاتی انتخابات کے انعقاد کے لئے تیار نہیں ہوتی۔ انہوں نے بتایا کہ جب ہم اپنی تیاریاں مکمل کر لیتے ہیں تو صوبائی حکومتیں قوانین میں ترامیم کردیتی ہیں، جس کی وجہ سے انتخابات کا عمل دوبارہ شروع کرنا پڑتا ہے۔سکندر سلطان راجہ نے مزید کہا کہ تین صوبوں اور کنٹونمنٹس میں جدوجہد کے بعد کمیشن بلدیاتی انتخابات کے انعقاد میں کامیاب ہوا، اور اب صوبوں کی ذمہ داری ہے کہ وہ بروقت بلدیاتی انتخابات کرائیں۔ انہوں نے بتایا کہ مختلف اوقات میں صوبائی حکومتوں نے پانچ مرتبہ انتخابی قوانین تبدیل کیے، اور الیکشن کمیشن نے انتخابات کے لئے تین دفعہ حلقہ بندیاں کیں، لیکن شیڈول دینے کے باوجود صوبوں میں بلدیاتی انتخابات کا انعقاد ممکن نہ ہوسکا۔چیف سیکرٹری پنجاب نے کمیشن کو بتایا کہ موجودہ حکومت نے حکومت سنبھالنے کے بعد لوکل باڈیز ایکٹ پر کام شروع کر دیا تھا اور تمام سٹیک ہولڈرز کا فیڈبیک ضروری تھا۔ انہوں نے مزید کہا کہ پنجاب اسمبلی میں ضروری قانون سازی کے لئے لوکل گورنمنٹ ایکٹ کا حتمی مسودہ بھجوا دیا گیا ہے اور جیسے ہی قانون سازی مکمل ہوگی، رولز بھی بنا دیے جائیں گے۔الیکشن کمیشن نے ہدایت کی کہ پنجاب حکومت بلدیاتی انتخابات کی قانون سازی کا عمل فوری مکمل کرے تاکہ الیکشن کمیشن پنجاب میں حلقہ بندیوں کا عمل شروع کر سکے اور بلدیاتی انتخابات کے انعقاد کو یقینی بنایا جا سکے۔