کراچی میں واٹر ٹینکر نے ایک اور ماں کے بیٹے کو موت کی نیند سلا دیا

کراچی( اباسین خبر)کراچی میں واٹر ٹینکر نے ایک اور ماں کے بیٹے کو کچل کر موت کی نیند سلا دیا۔حادثہ بفرزون کے بی آر سوسائٹی میں پیش آیا، جہاں واٹر ٹینکر کے پہیوں تلے آ کر نوعمر لڑکا جاں بحق ہوگیا۔ مشتعل مکینوں نے پتھراو کر کے واٹر ٹینکر کے شیشے توڑ دیئے، جبکہ پولیس نے ڈرائیور کو گرفتار کر کے ٹینکر قبضے میں لے لیا۔پولیس حکام نے بتایا کہ جان لیوا حادثہ بفرزون کے بی آر سوسائٹی بروہی گوٹھ میں پیش آیا، جہاں واٹر ٹینکر پانی سپلائی کرنے آیا تھا اور ریورس کرتے ہوئے علاقے کا لڑکا ٹینکر کے پہیوں تلے آ کر جاں بحق ہوگیا۔ جاں بحق ہونے والے بچے کی شناخت 10 سالہ صائم کے نام سے کی گئی، اور پولیس مزید تحقیقات کر رہی ہے۔مکینوں کا کہنا تھا کہ علاقے میں میٹھا پانی ناپید ہے، اسی وجہ سے مکین فلٹر پلانٹ سے پینے کا پانی حاصل کرتے ہیں۔ ہسپتال میں متوفی کے تایا نے بتایا کہ متوفی صارم 3 بہنوں اور 2 بھائیوں میں سب سے بڑا تھا اور چوتھی کلاس کا طالب علم تھا۔