افواج ِ پاکستان کیخلاف سوشل میڈیا مہم میں بھارتی ایجنٹس ملوث ہیں: گورنر سندھ

برمنگھم( مانیٹرنگ ڈیسک)گورنر سندھ کامران خان ٹیسوری نے کہا ہے کہ آرمی چیف اور افواجِ پاکستان کے خلاف سوشل میڈیا مہم میں بھارتی ایجنٹس اور خوارج ملوث ہیں، اور ہمیں محتاط رہنا چاہیے۔برمنگھم میں اوورسیز پاکستانیوں سے خطاب کرتے ہوئے انہوں نے کہا کہ سوشل میڈیا پر پاکستان بمقابلہ بھارت کا منظرنامہ پیش کیا جا رہا ہے، جہاں بھارت پاکستان کے معاشی و معاشرتی نظام کو نقصان پہنچانے کی سازش کر رہا ہے۔ کامران ٹیسوری نے سوشل میڈیا پر غیر مصدقہ خبریں پھیلانے سے اجتناب کرنے کی اپیل کی، کیونکہ غلط خبروں سے پاکستان کے وقار کو نقصان پہنچتا ہے۔انہوں نے مزید کہا کہ اوورسیز پاکستانیوں کی سب سے بڑی پہچان پاکستانی نژاد ہونا ہے، اور اس لقب کو اتنا معتبر بنانا ضروری ہے کہ دنیا پاکستان اور اس کے شہریوں کو عزت دے۔ پاکستان آرمی اور ایس آئی ایف سی جیسے ادارے وہ ہیں جو ملک کو اپنے پیروں پر کھڑا کر سکتے ہیں، اور ہمیں صرف پاکستان کے لیے کھڑا ہونا ہے، نہ کہ کسی فرد یا جماعت کے لیے۔کامران ٹیسوری کا کہنا تھا کہ پاکستان کی عزت اور وقار ہم سب کی ذمہ داری ہے، اور اس کے لیے مثبت کردار ادا کرنا ضروری ہے۔ وہ یہاں کسی کی حمایت کرنے کے لیے نہیں بلکہ ملک کے مستقبل پر بات کرنے آئے ہیں، کیونکہ پاکستان ہم سب کا ہے اور اسے مضبوط بنانے کے لیے ہر ایک کو اپنا کردار ادا کرنا ہوگا۔