کراچی ( اباسین خبر)پاک بحریہ کے اسپیشل سروس گروپ اور رائل سعودی نیول فورسز کی اسپیشل آپریشن فورس (ایس او ایف) کے درمیان دو طرفہ تربیتی مشق افعی الساحل VII فائنل ٹیسٹ ایکسرسائز (ایف ٹی ایکس) کراچی میں اختتام پذیر ہوگئی۔ترجمان پاک بحریہ کے مطابق، کمانڈر کوسٹ رئیر ایڈمرل فیصل امین نے دونوں ممالک کے اعلی فوجی حکام کے ہمراہ اس مشق کا مشاہدہ کیا۔ مشق کے دوران ٹیموں نے مشترکہ طور پر اعلی درجے کی حکمت عملی، لائیو فائر ڈرلز، چھاپہ مار کارروائیاں اور پر خطر ماحول میں ریپیلنگ کی مہارت کا مظاہرہ کیا۔مشق میں انسداد دہشت گردی، یرغمالیوں کو بچانے اور مربوط بحری آپریشنز کی تربیتی سرگرمیاں شامل تھیں، جس سے دونوں ممالک کی مشترکہ آپریشنز کی صلاحیتوں کو مزید تقویت ملی۔ترجمان نے کہا کہ افعی الساحل مشق کا کامیاب انعقاد رائل سعودی نیول فورسز اور پاک بحریہ کے درمیان بڑھتے ہوئے تعاون کا منہ بولتا ثبوت ہے۔ انہوں نے مزید کہا کہ یہ مشق مشترکہ بحری سلامتی کے چیلنجز سے نمٹنے کے لیے دونوں افواج کی صلاحیتوں، باہمی تعاون اور مشترکہ حکمت عملی کی مہارت کو مزید مضبوط بنائے گی۔
پاکستان اور سعودی عرب کی نیول فورسز کی دو طرفہ مشق کراچی میں اختتام پذیر
5
