کراچی: امریکی قونصلیٹ کی شکایت پر ویزا کنسلنٹنٹ گرفتار

کراچی( اباسین خبر)کراچی میں ایف آئی اے اینٹی ہیومن ٹریفکنگ سرکل نے جعلی دستاویزات تیار کرنے میں ملوث ملزم محمد مشتاق راجپوت کو گرفتار کر لیا۔ ملزم کو کراچی میں ایک چھاپہ مار کارروائی کے دوران حراست میں لیا گیا۔یہ کارروائی امریکی قونصلیٹ کراچی کی شکایت پر کی گئی، جس میں بتایا گیا تھا کہ ملزم جعلی اپوائنٹمنٹ لیٹرز تیار کر کے شہریوں کو دھوکہ دے رہا تھا۔ ابتدائی تفتیش کے دوران معلوم ہوا کہ ملزم “منصور کنسلٹنٹ” کے نام سے ویزا کنسلٹینسی کا کاروبار چلا رہا تھا اور ایک شہری کو جعلی اپوائنٹمنٹ لیٹر جاری کیا تھا۔مزید تحقیقات میں یہ بات سامنے آئی کہ ملزم نے متاثرہ شہری سے جعلی دستاویزات کے عوض 2 لاکھ روپے وصول کیے تھے۔ جب شہری نے اپوائنٹمنٹ کی تصدیق کے لیے رابطہ کیا تو جعلسازی کا انکشاف ہوا، جس پر امریکی حکام نے تحریری شکایت درج کروائی۔ایف آئی اے نے فوری کارروائی کرتے ہوئے ملزم کو گرفتار کر لیا اور اس کے خلاف تحقیقات کا آغاز کر دیا ہے۔