ہمارا بیانیہ عوام کو مہنگائی سے نجات دلاکر خوشحال بنانا ہے: نواز شریف

لاہور( اباسین خبر)مسلم لیگ( ن) کے صدر و سابق وزیراعظم میاں نواز شریف نے کہا ہے کہ ان کا بیانیہ ملک کی ترقی اور عوام کو مہنگائی سے نجات دلا کر خوشحال بنانا ہے۔میاں نواز شریف اور وزیراعلی پنجاب مریم نواز سے ارکان پنجاب اسمبلی نے ملاقات کی، جس میں پارٹی کے سینئر رہنما سینیٹر پرویز رشید، رانا ثنا اللہ، مریم اورنگزیب اور راشد نصر اللہ بھی شریک تھے۔اس موقع پر گفتگو کرتے ہوئے میاں نواز شریف نے کہا کہ بدقسمتی سے ماضی میں ترقی کرتا ملک پٹڑی سے اتر گیا، سیاست میں گند ڈال کر اسے تباہ کیا گیا۔ بد تہذیبی، بدتمیزی، بغض اور انتقام کو سیاست کا حصہ بنا دیا گیا، جس کے نتیجے میں معیشت اور اقدار تباہ ہوئیں۔ انہوں نے کہا کہ پاکستان ڈیفالٹ کے قریب تھا، لیکن وزیراعظم شہباز شریف کی محنت سے معاشی استحکام واپس آیا ہے، اور پالیسیوں کے تسلسل سے معاشی ترقی یقینی ہو گی۔ انہوں نے مزید کہا کہ کرپشن، مہنگائی اور معاشی تباہی “تبدیلی” کی سوغاتیں تھیں، جبکہ ہم نے آئی ایم ایف کو خدا حافظ کہہ دیا تھا۔صدر مسلم لیگ ن نے یہ بھی کہا کہ ان کا بیانیہ عوام کو مہنگائی سے نجات دلا کر خوشحال بنانا ہے، اور جو وعدے کئے تھے وہ اللہ کی مدد سے پورے ہوتے دکھائی دے رہے ہیں۔وزیراعلی پنجاب مریم نواز نے کہا کہ عوام کی خدمت کا مشن چیلنج سمجھ کر قبول کیا اور قیادت کا شکریہ ادا کیا کہ انہوں نے یہ ذمہ داری دی۔ارکان اسمبلی نے نواز شریف اور شہباز شریف کے بارے میں کہا کہ یہ دونوں شخصیات وعدوں کی تکمیل اور وطن سے وفا کی علامت ہیں، جنہوں نے ذاتی تکالیف کو پس پشت ڈالتے ہوئے ہمیشہ پاکستان اور عوام کی خدمت کی۔ ارکان نے وزیراعظم شہباز شریف کی “شہباز سپیڈ” کی تعریف کرتے ہوئے کہا کہ ان کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا۔ارکان اسمبلی نے مزید کہا کہ مریم نواز نے وزیراعلی کے طور پر اپنی صلاحیتوں کا اعتراف کرایا اور ان کی عوامی خدمت کا ہر طرف اعتراف ہو رہا ہے۔ انہوں نے کہا کہ مریم نواز کی قیادت میں پنجاب میں مساوی خدمت جاری ہے اور چولستان میں گرین پاکستان منصوبے کا آغاز ایک انقلابی قدم ہے، جس سے کسانوں کو جدید مشینری اور زرعی سہولتیں فراہم کی جا رہی ہیں، جو زرعی انقلاب کا پیش خیمہ ثابت ہو رہا ہے۔