فواد چودھری نے پی ٹی آئی کی سیاسی کمیٹی کو دو ٹکے کی قرار دے دیا

لاہور( اباسین خبر) سابق وفاقی وزیر فواد چودھری نے تحریک انصاف کی سیاسی کمیٹی کو “دو ٹکے کی” قرار دے دیا۔سماجی رابطے کی ویب سائٹ ایکس پر اپنے پیغام میں فواد چودھری نے کہا کہ یہ سیاسی کمیٹی بانی پی ٹی آئی کے جیل میں ہونے والے سلوک پر خاموش رہی، لیکن اب ایک غیر اہم کلرک کے حوالے سے قراردادیں یاد آ گئیں۔انہوں نے مزید کہا کہ تحریک انصاف کی سیاسی کمیٹی میں اکثریت ان افراد کی ہے جو ایک دن کے لیے بھی جیل نہیں گئے، جنہوں نے کروڑوں روپے کے فنڈز کھائے اور فنڈنگ کا حساب دینے سے انکاری ہیں۔ فواد چودھری نے یہ بھی کہا کہ جن کی “اوقات دو ٹکے کی نہیں”، ان سے فنڈنگ کا حساب لینا انتہائی ضروری ہے۔