چیف جسٹس نے سپریم کورٹ کی متعدد انتظامی کمیٹیوں کی تشکیل نو کر دی

اسلام آباد( اباسین خبر) چیف جسٹس آف پاکستان یحیی آفریدی نے سپریم کورٹ کی متعدد انتظامی کمیٹیوں کی تشکیل نو کر دی ہے۔رپورٹس کے مطابق یہ تشکیل نو سپریم کورٹ میں نئے ججز کی تعیناتی کو مدنظر رکھتے ہوئے کی گئی ہے۔ جسٹس مسرت ہلالی کو خیبر پختونخوا کی انسداد دہشت گردی عدالتوں کی نگران جج مقرر کیا گیا، جبکہ جسٹس ملک شہزاد کو پنجاب، جسٹس ہاشم کاکڑ کو بلوچستان اور جسٹس صلاح الدین پنور کو سندھ کی انسداد دہشت گردی عدالتوں کا نگران مقرر کیا گیا۔ اسی طرح، جسٹس عامر فاروق اسلام آباد کی اے ٹی سی عدالتوں کے نگران ہوں گے۔سپریم کورٹ کی بلڈنگ کمیٹی کی سربراہی جسٹس جمال مندوخیل کے سپرد کر دی گئی ہے، جبکہ جسٹس شفیع صدیقی اور جسٹس عامر فاروق اس کمیٹی کے ممبران ہوں گے۔ چیف جسٹس یحیی آفریدی خود آئی ٹی کمیٹی کی سربراہی کریں گے، جس میں جسٹس محمد علی مظہر اور جسٹس میاں گل حسن ممبر ہوں گے۔ریسرچ سینٹر کمیٹی کی سربراہی جسٹس شاہد بلال حسن کے سپرد کی گئی ہے، جبکہ جسٹس شفیع صدیقی اور جسٹس عامر فاروق اس کمیٹی کے ممبران ہوں گے۔ جسٹس محمد علی مظہر کو لا کلرک پروگرام کمیٹی کا سربراہ اور جسٹس میاں گل حسن کو ممبر مقرر کیا گیا ہے۔چیمبر اپیلز سننے کے لیے پانچ ججز کو نامزد کیا گیا ہے، جن میں چیف جسٹس یحیی آفریدی، جسٹس حسن اظہر رضوی، اور جسٹس ہاشم کاکڑ شامل ہیں۔ جسٹس صلاح الدین پنور اور جسٹس شکیل احمد بھی مختلف نوعیت کی چیمبر اپیلوں کی سماعت کریں گے۔سپریم کورٹ آرکائیو اینڈ میوزیم کمیٹی کی سربراہی جسٹس حسن اظہر رضوی کے سپرد کی گئی ہے، جبکہ جسٹس صلاح الدین پنور اور جسٹس میاں گل حسن اورنگزیب اس کمیٹی کے ممبران ہوں گے۔فوری انصاف اور ماڈل کورٹس سے متعلق کمیٹی کی سربراہی جسٹس ملک شہزاد کے سپرد کی گئی ہے، اور جسٹس ہاشم کاکڑ، جسٹس صلاح الدین پنور، اور جسٹس اشتیاق ابراہیم اس کمیٹی کے ارکان ہوں گے۔چیف جسٹس نے جسٹس اشتیاق ابراہیم کو سکیورٹی جج تعینات کیا ہے، جو سپریم کورٹ کی بلڈنگ، رجسٹر یا اور ججز کالونی کے سکیورٹی امور دیکھیں گے۔جسٹس میاں گل حسن کو فیملی اور بچوں کی حوالگی کیسز میں پاک برطانیہ پروٹوکول کے رابطہ کار جج تعینات کیا گیا ہے۔سپریم کورٹ عملے کے یونفارم کی کوالٹی چیک کرنے کے لیے قائم کمیٹی کو تحلیل کر دیا گیا ہے، اور رجسٹرار سپریم کورٹ نے تمام کمیٹیوں اور تقرریوں کے الگ الگ نوٹیفکیشن جاری کر دیے ہیں۔