وزیرداخلہ سے قائم مقام امریکی سفیر کی ملاقات، دہشتگردی سمیت اہم امور پر گفتگو

اسلام آباد( اباسین خبر)وفاقی وزیر داخلہ محسن نقوی اور امریکا کی قائم مقام سفیر نیٹلی بیکر کے درمیان ملاقات میں دونوں ممالک کے تعلقات، باہمی دلچسپی کے امور اور دو طرفہ تعاون بڑھانے پر تفصیلی بات چیت ہوئی۔ وزیر داخلہ نے اپنے حالیہ دورہ امریکا کے حوالے سے گفتگو کرتے ہوئے بتایا کہ امریکی کانگریس کے اراکین سے ملاقاتیں مثبت رہیں اور دہشت گردی کے خلاف مشترکہ لائحہ عمل ترتیب دینے پر تفصیل سے تبادلہ خیال کیا گیا۔محسن نقوی نے کہا کہ دہشت گردی ایک عالمی مسئلہ ہے اور اس کا مقابلہ کرنے کے لیے عالمی برادری کو مل کر کام کرنا ہوگا۔ انہوں نے پاکستان اور امریکا کے تعلقات کو انتہائی اہم قرار دیا اور اس بات کا یقین ظاہر کیا کہ صدر ڈونلڈ ٹرمپ کے دور میں دونوں ممالک کے تعلقات مزید مستحکم ہوں گے۔ملاقات میں وزیر داخلہ نے قائم مقام امریکی سفیر کو اسلام آباد میں منعقد ہونے والے جشن بہاراں پروگرام میں شرکت کی دعوت بھی دی۔