پاکستان کا امریکا کی جانب سے بھارت کو اسلحہ کی فراہمی پر تحفظات کا اظہار

اسلام آباد( اباسین خبر)پاکستان نے امریکا کی جانب سے بھارت کو جدید اسلحہ کی فراہمی پر شدید تحفظات کا اظہار کیا ہے۔ترجمان دفتر خارجہ شفقت علی خان نے ہفتہ وار پریس بریفنگ میں کہا کہ امریکا کے اس اقدام سے جنوبی ایشیا کے امن میں عدم استحکام پیدا ہوگا۔ انہوں نے کہا کہ پاکستان کے بارے میں بھارت اور امریکا کا مشترکہ بیان غلط اور بے بنیاد ہے، اور پاکستان دہشت گردی سے متاثرہ ملک ہونے کے ناطے عالمی امن و استحکام کے فروغ کا خواہاں ہے۔شفقت علی خان نے مزید کہا کہ بھارت عوامی حقوق کی پامالی کا جواب دینے میں ناکام رہا ہے اور مقبوضہ کشمیر میں انسانی حقوق کی خلاف ورزیوں میں ملوث ہے۔ترجمان دفتر خارجہ نے بتایا کہ وزیر اعظم شہباز شریف کی دعوت پر ترک صدر رجب طیب اردوان نے پاکستان کا دورہ کیا، جہاں ان کے ہمراہ ایک اعلی سطح کا وفد بھی موجود تھا۔ ترک صدر نے وزیراعظم اور صدر مملکت سے ملاقاتیں کیں اور دونوں رہنماں نے عالمی و علاقائی صورتحال پر تبادلہ خیال کیا۔انہوں نے کہا کہ ترک صدر نے پاکستان کے ساتھ تجارتی و سرمایہ کاری تعلقات بڑھانے پر زور دیا اور قبرص کے معاملے پر پاکستان کی حمایت پر شکریہ ادا کیا۔شفقت علی خان نے وزیر اعظم شہباز شریف کے متحدہ عرب امارات کے دورے کی تفصیلات بھی فراہم کیں، جہاں انہوں نے ورلڈ گورنمنٹس سمٹ میں شرکت کی اور دیگر عالمی رہنماں سے ملاقاتیں کیں۔اس کے علاوہ، انہوں نے اسرائیل کے غزہ میں آبادکاری کے حوالے سے بیان کی مذمت کی اور کہا کہ یہ بیان غیر ذمہ دارانہ اور اشتعال انگیز ہے، پاکستان سعودی عرب کے ساتھ مکمل یکجہتی کا اظہار کرتا ہے۔ترجمان دفتر خارجہ نے لیبیا کشتی حادثے میں 63 پاکستانیوں کی موجودگی کی تصدیق کرتے ہوئے کہا کہ 16 افراد کی لاشوں کی شناخت ہوچکی ہے، 3 زندہ افراد سفارت خانے کے پاس ہیں جبکہ 10 پاکستانی ابھی تک لاپتا ہیں۔انہوں نے بتایا کہ وزیر خارجہ اسحاق ڈار 18 فروری کو یو این سکیورٹی کونسل کے اجلاس میں شرکت کریں گے اور اجلاس کی سائیڈ لائنز پر دو طرفہ ملاقاتیں بھی کریں گے۔