موٹر وے ٹول ٹیکس میں اضافے کیخلاف درخواست پر وفاقی حکومت کو نوٹس

پشاور( اباسین خبر)پشاور ہائی کورٹ نے موٹر وے ٹول ٹیکس میں اضافے کے خلاف درخواست پر وفاقی حکومت کو نوٹس جاری کر دیا ہے۔ درخواست گزار کے وکیل عظیم داد ایڈووکیٹ نے عدالت میں مقف اختیار کیا کہ حکومت نے 31 جنوری 2025 کو ٹول ٹیکس میں اضافہ کیا ہے، اور ایم ٹیگ نہ لگانے والوں کے لیے ٹول ٹیکس میں 100 فیصد اضافہ کیا گیا ہے۔وکیل نے بتایا کہ حکومت نے 2024 میں دو بار ٹول ٹیکس میں اضافہ کیا، جس کے باعث پشاور سے چارسدہ کے درمیان ٹول ٹیکس 30 سے 40 روپے اور پھر 40 سے 60 روپے تک بڑھا دیا گیا۔ درخواست میں یہ بھی کہا گیا کہ ایم ٹیگ نہ لگانے پر 100 فیصد اضافے کا فیصلہ غیر قانونی ہے، اور ٹول ٹیکس میں اس اضافے سے عوام کو مشکلات کا سامنا ہے۔جسٹس ایس ایم عتیق شاہ نے ریمارکس دیتے ہوئے کہا کہ انہیں بھی اس اضافے کا علم ہے۔ درخواست گزار کے وکیل نے عدالت سے استدعا کی کہ اس اضافے کو عارضی طور پر روکنے کے لیے حکم امتناع جاری کیا جائے۔ عدالت نے اس پر کہا کہ اس حوالے سے مناسب حکم جاری کیا جائے گا اور وفاقی حکومت کو نوٹس جاری کر کے کیس کی مزید سماعت ملتوی کر دی۔