آٹو سیکٹر میں نمایاں بہتری، جنوری میں گاڑیوں کی فروخت میں 65 فیصد اضافہ ریکارڈ

لاہور( کامرس ڈیسک)ملک کے آٹو سیکٹر میں جنوری 2025 میں نمایاں بہتری آئی، اور گاڑیوں کی فروخت میں 65 فیصد اضافہ ریکارڈ کیا گیا۔پاکستان آٹوموٹو مینوفیکچررز ایسوسی ایشن (پاما) کی رپورٹ کے مطابق، جنوری میں آٹو سیکٹر میں الیکٹرک وہیکل، جیپ، کار، وین سمیت دیگر یونٹس کی مجموعی فروخت 17 ہزار تک پہنچ گئی۔ آٹو سیکٹر کی فروخت جنوری 2024 کے مقابلے میں 61 فیصد بہتر رہی، جبکہ مالی سال 2025 کے ابتدائی سات ماہ میں آٹو سیکٹر کی فروخت 56 فیصد بڑھ کر 78 ہزار سے تجاوز کر گئی۔رپورٹ میں بتایا گیا کہ مسافر گاڑیوں کی فروخت 11,868 یونٹس رہی، جو دسمبر 2024 میں 7,864 یونٹس کے مقابلے میں 51 فیصد زائد ہے۔ 1300 سی سی اور اس سے زیادہ کی گاڑیوں کی فروخت میں 85 فیصد کا اضافہ ہوا اور یہ 5,518 یونٹس تک پہنچ گئی۔ 1000 سی سی گاڑیوں کی فروخت میں 30 فیصد اضافہ ہوا جبکہ 1000 سی سی سے کم گاڑیوں کی فروخت 63 فیصد بڑھ کر 5,633 یونٹس رہی۔رپورٹ کے مطابق، ٹرکوں کی فروخت میں 344 فیصد اضافہ دیکھا گیا جبکہ بسوں کی فروخت میں 61 فیصد کمی آئی۔ موٹر سائیکلوں کی فروخت میں بھی نمایاں اضافہ ہوا اور یہ 132,947 یونٹس تک پہنچ گئی۔آٹو ماہرین کا کہنا ہے کہ پاکستان میں آٹو سیکٹر میں بہتری شرح سود میں کمی اور روپے کی قدر میں بہتری کا نتیجہ ہے۔