میلبرن( سپورٹس ڈیسک)کرکٹ آسٹریلیا نے چیمپئنز ٹرافی کے لیے اپنی حتمی سکواڈ کا اعلان کر دیا ہے، جس میں فاسٹ بالر مچل سٹارک کا نام شامل نہیں ہے۔ کرکٹ آسٹریلیا کا کہنا ہے کہ مچل سٹارک ذاتی وجوہات کی بنا پر ٹیم سے دستبردار ہوگئے ہیں اور ان کے فیصلے کا احترام کیا گیا ہے۔ مچل سٹارک نے اس فیصلے پر میڈیا سے پرائیویسی کی درخواست کی ہے اور وہ اس حوالے سے کوئی تبصرہ نہیں کریں گے۔کچھ دیگر اہم کھلاڑی بھی اس سکواڈ کا حصہ نہیں بن سکے۔ کپتان پیٹ کمنز، جوش ہیزل ووڈ اور مچل مارش فٹنس مسائل کے باعث پہلے ہی ٹیم سے باہر ہو چکے ہیں، جبکہ آل راونڈر مارکوس سٹوئنس نے ون ڈے کرکٹ سے ریٹائرمنٹ لے لی ہے۔چیمپئنز ٹرافی کے لیے منتخب ہونے والی ٹیم میں سٹیو سمتھ کی قیادت میں شان ایبٹ، الیکس کیری، بین ڈار شیوس اور نیتھن ایلس سمیت جیک فریزر میکگرک، ایرون ہارڈی، ٹریوس ہیڈ، جوش انگلس اور سپینسر جانسن بھی شامل ہیں۔ اس کے علاوہ مارنوس لبوشین، گلین میکسویل، تنویر سنگھا، میتھیو شارٹ اور ایڈم زمپا بھی ٹیم کا حصہ ہیں۔چیئرمین سلیکشن پینل جارج بیلی نے کہا کہ سکواڈ میں انجریز اور ریٹائرمنٹ کی وجہ سے تبدیلیاں کی گئیں، اور اب ان کھلاڑیوں کو منتخب کیا گیا ہے جنہوں نے گزشتہ 12 ماہ میں بہترین کارکردگی کا مظاہرہ کیا ہے۔
چیمپئنز ٹرافی: آسٹریلیا کے حتمی سکواڈ کا اعلان، سٹارک بھی دستبردار
6
