1
کراچی( کامرس ڈیسک)وزیر خزانہ محمد اورنگزیب نے کہا ہے کہ حکومت پائیدار ترقی کے لیے بنیادی اصلاحات کے ایجنڈے پر عمل کر رہی ہے۔پاکستان بینکنگ سمٹ 2025 سے خطاب کرتے ہوئے انہوں نے کہا کہ بینکنگ سیکٹر کا قومی معیشت میں اہم کردار ہے، جس نے ٹیکس ادائیگی میں تیل و گیس کے شعبے کو پیچھے چھوڑ دیا ہے۔ ہم نے 30 ارب روپے حکومت کو جمع کر کے دیے ہیں۔انہوں نے کہا کہ بینکنگ سیکٹر دستاویزی معیشت کے فارمولے پر کام کر رہا ہے اور ملکی معیشت بہتری کی جانب بڑھ رہی ہے۔ صوبائی اسمبلیوں سے زرعی ٹیکسوں کے بلوں کی منظوری اہم پیشرفت ہے۔ آئندہ بجٹ کی تیاری اور حکومتی اخراجات میں کمی کے لیے رائٹ سائزنگ پالیسی پر عمل جاری ہے۔وزیر خزانہ نے مزید کہا کہ پائیدار معاشی استحکام کے لیے برآمدات کا فروغ ضروری ہے اور حکومت سرمایہ کاری اور تاجروں کو ہر فورم پر سہولت فراہم کرے گی۔
