سنیارٹی تبدیل کرنے کیخلاف 5 ججز کی ریپریزنٹیشن مسترد کرنے کا تحریری فیصلہ جاری

اسلام آباد( اباسین خبر)اسلام آباد ہائیکورٹ کے ججز کی سنیارٹی تبدیل کرنے کے خلاف پانچ ججز کی ریپریزنٹیشن مسترد کرنے کا تحریری فیصلہ جاری کر دیا گیا۔ چیف جسٹس عامر فاروق نے ریپریزنٹیشن مسترد کرتے ہوئے رجسٹرار کو فیصلے کی کاپی متعلقہ ججز کو بھیجنے کی ہدایت کی۔جسٹس محسن اختر کیانی، جسٹس طارق جہانگیری، جسٹس بابر ستار، جسٹس سردار اعجاز اور جسٹس ثمن رفعت کی ریپریزنٹیشن مسترد کی گئی۔ تحریری فیصلے کے مطابق تین صوبائی ہائیکورٹس سے ججز کے تبادلے کے بعد اسلام آباد ہائیکورٹ میں سنیارٹی لسٹ برقرار رہے گی، اور لاہور ہائیکورٹ سے ٹرانسفر ہو کر آنے والے جسٹس سرفراز ڈوگر سینئر پیونی جج برقرار رہیں گے۔فیصلے میں کہا گیا کہ صوبائی ہائیکورٹس سے ٹرانسفر ہونے والے ججز کو دوبارہ حلف اٹھانے کی ضرورت نہیں، کیونکہ ججز کی تعیناتی اور ٹرانسفر میں فرق ہے۔ فیصلے میں بھارت کی مثال بھی دی گئی جہاں ججز کا ٹرانسفر عام بات ہے، تاہم پاکستان میں ٹرانسفر پالیسی نہیں ہے۔فیصلے کے مطابق آئین کے آرٹیکل 200 کے تحت جج کا ایک ہائی کورٹ سے دوسرے ہائی کورٹ میں ٹرانسفر ہوتا ہے، اور اس کا سٹیٹس تبدیل نہیں ہوتا۔