سائنس و ٹیکنالوجی کی دنیا میں خواتین کا کردار ناگزیر ہے: وزیراعلیٰ مریم نواز

لاہور( اباسین خبر)وزیر اعلی پنجاب مریم نواز نے کہا ہے کہ سائنس اور ٹیکنالوجی کی دنیا میں خواتین کا کردار نہ صرف ضروری بلکہ ناگزیر ہے۔خواتین اور لڑکیوں کے عالمی دن پر اپنے پیغام میں مریم نواز نے کہا کہ ترقی کے لیے ہمیں اپنی بیٹیوں کو جدید علوم اور آئی ٹی کی مہارتوں سے آراستہ کرنا ہوگا۔ پنجاب حکومت خواتین کو سائنسی اور تکنیکی میدان میں آگے لانے کے لیے عملی اقدامات کر رہی ہے۔انہوں نے مزید کہا کہ ہونہار سکالرشپ پروگرام کے تحت ہزاروں طالبات کو سائنسی شعبوں میں مکمل ٹیوشن فیس فراہم کی جا رہی ہے، تاکہ پنجاب میں کسی بیٹی کا خواب وسائل کی کمی کی وجہ سے ادھورا نہ رہے۔ لیپ ٹاپ سکیم کا مقصد طالبات کو جدید علوم اور ٹیکنالوجی تک رسائی فراہم کرنا ہے۔مریم نواز نے کہا کہ اس سکیم کے ذریعے ہماری بیٹیاں اپنی تعلیمی اور پیشہ ورانہ مہارتوں کو مزید بہتر کر سکیں گی، جبکہ ایڈوانس آئی ٹی ٹریننگ پروگرامز سے خواتین عالمی ڈیجیٹل مارکیٹ میں نمایاں مقام حاصل کر رہی ہیں۔ انہوں نے کہا کہ پاکستان کی ترقی خواتین کی ترقی سے جڑی ہوئی ہے۔وزیر اعلی پنجاب نے یہ بھی کہا کہ لاہور میں عوام خصوصا طالبات کے لیے مفت وائی فائی پروگرام کا آغاز کیا گیا ہے، اور ہم اپنی بیٹیوں کو ہر وہ سہولت فراہم کریں گے جو سائنس، ٹیکنالوجی اور آئی ٹی کے عالمی معیار کے مطابق آگے بڑھنے میں مدد دے۔ انہوں نے کہا کہ وہ ایسا پنجاب بنا رہی ہیں جہاں خواتین ترقی کی راہ میں کسی سے پیچھے نہ رہیں، بلکہ سب سے آگے ہوں۔