پاکستان تمام مذاہب کے لئے محفوظ ملک ہے: وزیراعظم شہباز شریف

اسلام آباد( اباسین خبر)وزیراعظم شہباز شریف نے کہا ہے کہ پاکستان تمام مذاہب کے لئے محفوظ ملک ہے۔عالمی ہفتہ برائے بین المذاہب ہم آہنگی کے موقع پر پیغام جاری کرتے ہوئے وزیراعظم شہباز شریف نے کہا کہ آج ہم عالمی برادری کے ساتھ مل کر بین المذاہب ہم آہنگی کا ہفتہ منا رہے ہیں۔انہوں نے کہا کہ سماجی ہم آہنگی اور اقدار کی پاسداری پر یقین رکھتے ہیں، اسلام انصاف، رحم اور مخلوقات کے احترام کا حکم دیتا ہے۔ انتہا پسندی اور تفرقہ انگیز بیان بازی سماجی تانے بانے کے لیے خطرہ ہے۔ان کا کہنا تھا کہ دنیا کو عدم برداشت اور تقسیم کے بڑھتے ہوئے چیلنجز کا سامنا ہے، امن اور اتحاد کے لیے اپنے اجتماعی عزم کا اعادہ کرنا ضروری ہے۔ شہری بھائی چارے کے رشتہ کو مضبوط کرنے کے لیے کردار ادا کرنا چاہیے۔شہباز شریف نے کہا کہ ہمیں لوگوں کو باہمی برداشت و تعاون کی اقدار اپنانے کی ترغیب دینی چاہیے۔ ہم رواداری اور باہمی احترام کے ماحول کو فروغ دینے کے لیے پرعزم ہیں اور خوف کی فضا پھیلانے والوں کو ہم اکٹھے ہو کر جواب دیتے ہیں۔انہوں نے مزید کہا کہ نفرت کے بیج بونے والوں کو ہم بات چیت سے جواب دیتے ہیں، مذہبی سکالرز، کمیونٹی رہنما اور شہری معاشرے میں مثبت کردار ادا کریں۔