قلات میں آپریشن: 23 دہشتگرد ہلاک، ایف سی کے 18 جوان شہید

کو ئٹہ ( اباسین خبر)بلوچستان میں سیکیورٹی فورسز نے دہشت گردوں کے خلاف کارروائی کرتے ہوئے 23 دہشت گردوں کو ہلاک کر دیا، جب کہ اس دوران ایف سی کے 18 بہادر جوان بھی جامِ شہادت نوش کر گئے۔انٹر سروسز پبلک ریلیشنز (آئی ایس پی آر) کے مطابق، یہ کارروائیاں بلوچستان کے ضلع قلات کے علاقے منگوچر میں کی گئیں، جہاں سیکیورٹی فورسز نے آپریشن کے دوران 12 دہشت گردوں کو ہلاک کیا۔ اس کے بعد، قلات میں ہونے والی کارروائی کے نتیجے میں ہرنائی کے علاقے میں ایک کلیئرنس آپریشن کیا گیا، جس میں مزید 11 دہشت گرد مارے گئے۔آئی ایس پی آر کے مطابق، 31 جنوری اور یکم فروری کی رات دہشت گردوں نے روڈ بلاک کرنے کی کوشش کی تھی، جس کے بعد سیکیورٹی فورسز اور قانون نافذ کرنے والے اداروں نے فوری طور پر کارروائی کی اور دہشت گردوں کے مذموم عزائم کو ناکام بنا دیا۔پاک فوج کے شعبہ تعلقات عامہ نے کہا کہ دشمن قوتوں کی ایما پر دہشت گردوں کا مقصد بلوچستان کے پرامن ماحول کو خراب کرنا تھا، تاہم دہشت گردی کے ان بزدلانہ حملوں کی حوصلہ افزائی کرنے والوں کو انصاف کے کٹہرے میں لایا جائے گا۔آئی ایس پی آر نے مزید کہا کہ بلوچستان کے استحکام اور ترقی کو سبوتاژ کرنے کی کوششوں کو ناکام بنانے کے لیے سیکیورٹی فورسز پرعزم ہیں، اور ہمارے بہادر سپاہیوں کی قربانیاں ہمارے عزم کو مزید مضبوط کرتی ہیں۔