ٹی وی ڈراموں کا نوجوان اداکار ٹریفک حادثے میں جاں بحق

ممبئی ( شوبز ڈیسک)23 سالہ بھارتی اداکار امان جیسوال جو ٹی وی ڈرامے “دھرتی پتر نندنی” میں مرکزی کردار کے لیے مشہور تھے، سڑک حادثے میں جاں بحق ہوگئے۔ یہ حادثہ جمعہ کے روز ممبئی کے علاقے جوگیشوری (ویسٹ) میں پیش آیا۔ پولیس کے مطابق یہ واقعہ ہل پارک روڈ پر سہ پہر 3:15 بجے پیش آیا، جہاں ٹرک ڈرائیور نے امان جیسوال کو موٹر سائیکل پر سوار حالت میں ٹکر ماری۔امان جیسوال شدید زخمی ہوئے اور انہیں فوری طور پر اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گئے۔ پولیس نے ٹرک ڈرائیور کو حراست میں لے لیا ہے اور مقدمہ درج کیا جا رہا ہے۔امان جیسوال کا تعلق اتر پردیش کے علاقے بلیا سے تھا، اور انہوں نے اپنے کیریئر کا آغاز ماڈلنگ سے کیا تھا۔ ان کی مشہور ٹی وی ڈرامہ سیریز “دھرتی پتر نندنی” میں ان کی پرفارمنس کو بہت سراہا گیا۔