معروف اداکار اور کامیڈین ماجد جہانگیر کی آج دوسری برسی

لاہور( شو بز ڈیسک)معروف اداکار اور کامیڈین ماجد جہانگیر کی آج دوسری برسی ہے۔ماجد جہانگیر نے پی ٹی وی پر 80 کی دہائی میں نشر ہونے والی ڈرامہ سیریز “ففٹی ففٹی” سے شہرت پائی، اور اس کی بے مثال کامیابی نے انہیں نیا مقام دیا۔ حکومت پاکستان نے ان کی شاندار پرفارمنس پر انہیں پرائیڈ آف پرفارمنس سے نوازا تھا۔ماجد جہانگیر 1949 میں کراچی میں پیدا ہوئے اور اپنے کیریئر کا آغاز پی ٹی وی کے مشہور شو “سات رنگ” سے کیا۔ 1979 میں پی ٹی وی کی مزاحیہ ڈرامہ سیریز “ففٹی ففٹی” میں ان کی اداکاری نے انہیں عوامی مقبولیت حاصل کی، اور اس کی کاسٹ نے بے حد شہرت سمیٹی۔80 کی دہائی کے آخر میں ماجد جہانگیر امریکا چلے گئے اور وہاں 23 برس گزارے۔ وطن واپسی پر انہوں نے ایک بار پھر مختلف ٹی وی چینلز پر اپنے فن کا مظاہرہ کیا اور پی ٹی وی کے لیے 22 سال تک کام کیا۔ اس کے علاوہ، انہوں نے 4 فلموں میں بھی اداکاری کے جوہر دکھائے۔ماجد جہانگیر کو “ففٹی ففٹی” میں شاندار کارکردگی پر 2020 میں تمغہ امتیاز اور پرائیڈ آف پرفارمنس سے نوازا گیا۔ 10 جنوری 2023 کو لاہور میں وفات پا جانے والے ماجد جہانگیر نے ہمیشہ اپنے مداحوں کے دلوں میں مسکراہٹیں بکھیر کر یادگار چھوڑیں۔