2
اسلام آباد( اباسین خبر)اسلام آباد ہائیکورٹ نے پیکا قانون کے خلاف درخواست پر اٹارنی جنرل آف پاکستان کو معاونت کے لیے طلب کر لیا۔اسلام آباد ہائیکورٹ کے جسٹس انعام امین منہاس نے پوٹھوہار یونین آف جرنلسٹس کی پیکا قانون ترمیم 2025 کے خلاف درخواست پر سماعت کی۔ درخواست گزار وکیل عادل عزیز قاضی عدالت میں پیش ہوئے۔ دورانِ سماعت، جسٹس انعام امین منہاس نے ریمارکس دیے کہ اس طرح کی اور درخواستیں بھی زیر سماعت ہیں، اس پر وہی آرڈر کر دیں گے۔بعد ازاں، عدالت نے اٹارنی جنرل آف پاکستان کو معاونت کے لیے طلب کرتے ہوئے سماعت ملتوی کر دی۔واضح رہے کہ پی ایف یو جے، اسلام آباد ہائیکورٹ جرنلسٹس ایسوسی ایشن اور دیگر درخواستیں بھی اسی سلسلے میں زیر سماعت ہیں، جن کی سماعت 17 اپریل کو مقرر کر دی گئی ہے۔
