آسٹریلین کرکٹر اسٹیو اسمتھ کا ون ڈے کرکٹ سے ریٹائرمنٹ کا اعلان

آسٹریلیا( سپورٹس ڈیسک)آسٹریلوی کرکٹر اسٹیو اسمتھ نے ون ڈے کرکٹ سے ریٹائرمنٹ کا اعلان کر دیا ہے۔ کرکٹ آسٹریلیا نے کہا ہے کہ اسٹیو اسمتھ نے میچ کے بعد اپنے ساتھی کھلاڑیوں کو فوری طور پر اپنے ریٹائرمنٹ کے فیصلے سے آگاہ کیا۔کرکٹ آسٹریلیا کا کہنا ہے کہ اسٹیو اسمتھ ٹیسٹ اور ٹی ٹوئنٹی کرکٹ کے لیے دستیاب رہیں گے۔اس حوالے سے اسٹیو اسمتھ نے کہا کہ “یہ سفر میرے لیے بہت شاندار رہا ہے، میں نے ہر لمحے سے محبت کی ہے۔ حیران کن لمحات اور شاندار یادیں میرے ساتھ رہیں گی۔ دو ورلڈ کپ جیتنا میرے کیریئر کی سب سے بڑی کامیابی ہے۔”اسمتھ نے مزید کہا کہ “اب لوگوں کے پاس موقع ہے کہ وہ ورلڈ کپ 2027 کی تیاری کریں، ٹیسٹ کرکٹ ہمیشہ میرے لیے ترجیح رہے گی۔” انہوں نے کہا کہ “میں ورلڈ ٹیسٹ چیمپئن شپ کے فائنل کا منتظر ہوں، دورہ ویسٹ انڈیز اور پھر انگلینڈ کے خلاف ہوم سیریز کا بھی منتظر ہوں، اور میں سمجھتا ہوں کہ میں اس وقت کرکٹ میں بہت حصہ ڈال سکتا ہوں۔”واضح رہے کہ چیمپئنز ٹرافی میں اسٹیو اسمتھ نے پیٹ کمنز کی غیر موجودگی میں کپتانی کی تھی، جہاں آسٹریلیا سیمی فائنل میں بھارت سے شکست کھا گیا تھا۔اسٹیو اسمتھ نے 2010 میں لیگ اسپنر کی حیثیت سے کرکٹ کی دنیا میں قدم رکھا اور 170 ون ڈے میچز میں 5800 رنز بنائے۔ انہوں نے اپنے کیریئر میں 12 سنچریاں، 35 نصف سنچریاں بنائیں اور 28 وکٹیں بھی حاصل کیں۔