روہت شرما تاریخ ساز ریکارڈ بنانے والے دنیا کے پہلے کپتان بن گئے

ممبئی( سپورٹس ڈیسک) بھارتی کرکٹ ٹیم کے کپتان روہت شرما نے ایک نیا سنگ میل عبور کیا ہے اور دنیا کے پہلے ایسے کپتان بن گئے ہیں جنہوں نے تمام چار آئی سی سی ٹورنامنٹس کے فائنل میں اپنی ٹیم کی قیادت کی۔روہت شرما نے بھارت کو جون 2023 میں ورلڈ ٹیسٹ چیمپئن شپ، نومبر 2023 میں ون ڈے ورلڈ کپ، جون 2024 میں ٹی 20 ورلڈ کپ اور اب مارچ 2025 میں چیمپئنز ٹرافی کے فائنل تک پہنچایا ہے۔اس سے قبل، مہندرا سنگھ دھونی نے بھارت کو 2007 اور 2014 کے ٹی 20 ورلڈ کپ فائنلز، 2011 کے ون ڈے ورلڈ کپ فائنل اور 2013 کی چیمپئنز ٹرافی کے فائنل تک پہنچایا تھا، لیکن وہ ورلڈ ٹیسٹ چیمپئن شپ کے فائنل میں نہیں پہنچ سکے۔نیوزی لینڈ کے کین ولیمسن نے اپنی ٹیم کو 2019 کے ون ڈے ورلڈ کپ، جون 2021 کے ورلڈ ٹیسٹ چیمپئن شپ اور نومبر 2021 کے ٹی20 ورلڈ کپ فائنل تک پہنچایا، لیکن ان کے دور میں نیوزی لینڈ چیمپئنز ٹرافی کے فائنل میں جگہ نہیں بنا سکا۔چیمپئنز ٹرافی 2025 میں روہت شرما کی قیادت میں بھارت ابھی تک ناقابل شکست رہا ہے۔ بھارتی ٹیم نے دبئی میں کھیلے گئے ابتدائی گروپ میچ میں بنگلہ دیش، روایتی حریف پاکستان اور نیوزی لینڈ کو شکست دی، جبکہ سیمی فائنل میں بھارت نے آسٹریلیا کو 4 وکٹوں سے شکست دی۔روہت شرما کپل دیو اور دھونی کے بعد آئی سی سی ٹرافی جیتنے والے تیسرے بھارتی کپتان ہیں۔ روہت اتوار کو اپنے دوسرے آئی سی سی ٹائٹل کے لیے میدان میں اتریں گے۔ فائنل میں بھارت کا مقابلہ نیوزی لینڈ اور جنوبی افریقہ کے درمیان دوسرے سیمی فائنل کے فاتح سے ہوگا۔