ریاستی اداروں کو سیاسی انتقام کیلئے استعمال نہیں ہونا چاہیے: بلاول بھٹو

کراچی( اباسین خبر) چیئرمین پاکستان پیپلزپارٹی بلاول بھٹو زرداری نے کہا ہے کہ ریاستی اداروں کو سیاسی انتقام کے لیے استعمال نہیں ہونا چاہیے۔آکسفورڈ یونین سے خطاب کرتے ہوئے بلاول بھٹو زرداری کا کہنا تھا کہ پاکستان کو کئی چیلنجز کا سامنا ہے اور یہاں جمہوریت مضبوط نہیں ہے۔ دیگر ممالک بھی جمہوریت سے متعلق چیلنجز کا سامنا کرتے ہیں، لیکن پیپلزپارٹی جمہوریت پر یقین رکھتی ہے اور اس نے میثاق جمہوریت میں اہم کردار ادا کیا۔انہوں نے کہا کہ پیپلزپارٹی نے اپنے دور میں اپوزیشن کو مصروف رکھا اور قومی سیاست میں جب ضرورت پڑی تو پیپلزپارٹی نے ہمیشہ ساتھ دیا۔ ماضی میں احتساب کے نام پر پیپلزپارٹی کو نشانہ بنایا جاتا رہا۔ بلاول بھٹو نے یاد دلایا کہ جب آصف زرداری پہلی بار منتخب ہوئے تو کوئی سیاسی قیدی نہیں تھا، تاہم پی ٹی آئی کے دور میں ان کی پھپھو کو گرفتار کیا گیا۔بلاول بھٹو کا کہنا تھا کہ پی ٹی آئی کے دور میں شہباز شریف اور دیگر سیاسی رہنماں کو بھی گرفتار کیا گیا۔ ہم سیاسی انتقام کے حق میں نہیں ہیں، بلکہ پیپلزپارٹی مسائل کے حل کے لیے مذاکرات پر یقین رکھتی ہے۔ پی ٹی آئی کے دور میں سیاسی قیدیوں کے لیے جیل مینو تبدیل کیا گیا اور اب اس تبدیلی اور جیل میں سہولتوں کی فراہمی کی استدعا کی جا رہی ہے۔انہوں نے مزید کہا کہ آصف زرداری نے بطور سیاسی قیدی طویل عرصہ جیل میں گزارا اور پیپلزپارٹی نے اقتدار میں آ کر کہا تھا کہ “جمہوریت بہترین انتقام ہے”۔ ہم نے ہمیشہ نیب کے احتساب کے نظام کی مخالفت کی اور سمجھتے ہیں کہ اداروں کو سیاسی انتقام کے لیے استعمال نہیں ہونا چاہیے۔