لالی وڈ کے معروف اداکار حبیب کو مداحوں سے بچھڑے 9 برس بیت گئے

لاہور( شوبز ڈیسک) لالی وڈ کے معروف اداکار حبیب کو مداحوں سے بچھڑے 9 برس بیت گئے۔ حبیب نے اداکاری، فلم سازی اور ہدایت کاری میں اپنی صلاحیتوں کا لوہا منوایا۔حبیب الرحمان کے نام سے معروف اداکار حبیب کا تعلق پٹیالہ کی ایک زمیندار فیملی سے تھا، اور ان کا خاندان 1947 میں پاکستان ہجرت کر آیا تھا۔ انہوں نے گورنمنٹ کالج لاہور سے ایم اے انگلش کیا، اور اردو و فارسی میں بھی ماسٹر ڈگری حاصل کی۔ وہ اریگیشن اور سول ایوی ایشن میں بھی ملازم رہے۔حبیب نے حادثاتی طور پر فلم انڈسٹری میں قدم رکھا لیکن جلد کامیاب ہو کر اسے مستقل پروفیشن بنا لیا۔ 1956 میں ان کی پہلی فلم لخت جگر تھی، جس میں انہوں نے ملکہ ترنم نور جہاں کے ساتھ کام کیا۔ ان کی کامیاب فلموں میں آدمی، گمراہ، کالاپانی، ایاز، ماں کے آنسو، اولاد، غزالہ، وقت اور دیوداس شامل ہیں۔حبیب نے پنجابی فلموں میں بھی اہم کردار نبھائے، جن میں موج میلہ، بابل دا ویہڑہ، میلہ دو دن دا اور چن شیر شامل ہیں۔ انہوں نے دو سندھی فلموں کی پروڈکشن اور ڈائریکشن بھی کی۔حبیب کو ان کی فنی خدمات کے اعتراف میں پرائیڈ آف پرفارمنس اور نگار ایوارڈز سے نوازا گیا۔ وہ 25 فروری 2016 کو لاہور میں مختصر علالت کے بعد انتقال کر گئے۔