علی حیدر پاکستان کو خیر باد کہہ کر بیرون ملک منتقل

کراچی( شوبز ڈیسک)گلوکار علی حیدر نے کہا ہے کہ ان کے لیے پاکستان میں رہنا غیر محفوظ ہوگیا تھا، جس کی وجہ سے انہیں ملک چھوڑ کر جانا پڑا۔علی حیدر حال ہی میں ایک پوڈکاسٹ میں شریک ہوئے، جہاں انہوں نے موسیقی سے دور ہونے اور اپنی نجی زندگی کے حوالے سے کھل کر بات کی۔ گلوکار نے بتایا کہ انہوں نے پاپ میوزک چھوڑ کر نعتیں، حمد و ثنا اور منقبت پڑھنا شروع کر دیا تھا، اور گانوں کی طرف ان کا رجحان کم ہوگیا تھا۔ اس تبدیلی کے بعد ان کے لیے حالات مشکل ہوگئے اور انہیں دھمکیاں ملنے لگیں۔علی حیدر نے مزید کہا کہ ان کے والد کا پرنٹنگ پریس تھا، جسے انہیں بند کرنا پڑا اور وہ گھر بیٹھ گئے۔ دھمکیوں کی وجہ سے نہ صرف وہ بلکہ ان کے اہل خانہ بھی غیر محفوظ ہوگئے تھے، جس کے بعد ان کی والدہ نے انہیں ملک چھوڑ کر کہیں اور منتقل ہونے کا مشورہ دیا۔گلوکار نے بتایا کہ ایک پرانے دوست نے، جن کے ساتھ انہوں نے کئی کنسرٹس کیے تھے، انہیں امریکہ بلا لیا، اور وہ کام کے لیے وہاں گئے۔ بیوی بچوں کے ساتھ وہیں سیٹل ہوگئے اور اب وہ وہاں ریڈیو شوز کرتے ہیں۔