کراچی ( مانیٹرنگ ڈیسک)پاکستانی طالبہ انارہ بہرام درانی نے سنگاپور میں منعقدہ اسٹیمکو سائنس گلوبل مقابلوں میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا ہے اور پاکستان کا نام عالمی سطح پر روشن کیا ہے۔پاکستان بھر سے صرف 15 طلبا فائنلز تک پہنچے، جہاں انہوں نے 13 ممالک کے 177 شرکا کے ساتھ مقابلہ کیا۔ اس سے پہلے 26,000 پاکستانی طلبا نے اس مقابلے میں حصہ لیا تھا، جن میں سے صرف پندرہ طلبا نے عالمی سطح کے مقابلے کے لئے جگہ بنائی۔انارہ بہرام درانی نے پہلے مرحلے میں پاکستان بھر میں گولڈ میڈل جیتا اور پھر سنگاپور میں ہونے والے اسٹیمکو سائنس گلوبل مقابلوں میں بھی وہ گولڈ میڈل حاصل کر کے پاکستان کا نام روشن کیا۔ یہ ایونٹ 12 سے 17 فروری 2025 تک نیشنل یونیورسٹی آف سنگاپور میں منعقد ہوا تھا، جہاں دنیا بھر کے نوجوان سائنسدانوں نے اپنی مہارت کا مظاہرہ کیا۔انارہ بہرام درانی نے اس سے قبل پاکستان میں انٹرنیشنل کینگرو سائنس مقابلے میں بھی غیر معمولی کارکردگی دکھائی تھی۔ ان کی کامیابی سائنس میں لڑکیوں کی بڑھتی ہوئی نمائندگی کی اہم مثال ہے اور انارہ اس راستے کی پہلی روشن مثال بنی ہیں۔یہ ایونٹ نوجوان ذہنوں کو سائنس اور جدت طرازی کی طرف راغب کرنے کا ایک اہم پلیٹ فارم ثابت ہو رہا ہے۔
اسٹیمکو سائنس مقابلے میں پاکستانی طالبہ کی شاندار کارگردگی, گولڈ میڈل جیت لیا
2