ملک کی عوام کو جمہوریت اور حقوق چاہئیں: تحریک انصاف

کراچی( اباسین خبر)سیکرٹری جنرل پی ٹی آئی سلمان اکرم راجہ نے کہا کہ ملک کی عوام کو جمہوریت اور حقوق کی ضرورت ہے۔شہر قائد میں محمود خان اچکزئی، صاحبزادہ حامد رضا، اسد قیصر اور سردار لطیف کھوسہ کے ہمراہ میڈیا سے گفتگو کرتے ہوئے سلمان اکرم راجہ نے کہا کہ اقلیتوں کو بھی حقوق حاصل ہیں اور ہم سب کو اپنے حقوق کے لیے اکٹھے لڑنا ہے۔ انہوں نے مزید کہا کہ پاکستانی عوام جمہوریت اور حقوق چاہتے ہیں، اور ان کا مطالبہ ہے کہ ان کے ووٹ کی عزت ہو، کیونکہ جمہوریت کے علاوہ پاکستان کا کوئی مستقبل نہیں۔سلمان اکرم راجہ نے یہ بھی کہا کہ عمران خان نے خط کے ذریعے اداروں اور قوم کے ضمیر کو جھنجھوڑا ہے، وہ کسی ریلیف کی درخواست نہیں کر رہے بلکہ اداروں سے آئین کی پاسداری کی اپیل کر رہے ہیں۔ انہوں نے کہا کہ تمام اداروں کو اپنی حدود میں رہ کر کام کرنا ہوگا۔سردار لطیف کھوسہ نے کہا کہ 26 نومبر کو نہتے مظاہرین پر گولیاں چلائی گئیں، اور وزیراعظم شہباز شریف، وزیرداخلہ خواجہ آصف اور آئی جی پنجاب اس کے ذمہ دار ہیں۔ انہوں نے کہا کہ یہ فسطائیت کا دور ہے اور ملک کو بے آئین سرزمین بنا دیا گیا ہے۔ پیکا ایکٹ کو مسترد کرتے ہوئے انہوں نے چیف جسٹس کو عمران خان کے خط کی حمایت کی۔صاحبزادہ حامد رضا نے کہا کہ 26 نومبر کے واقعے کی سی سی ٹی وی فوٹیج فراہم نہیں کی گئی اور حکام جھوٹ بول رہے ہیں۔ انہوں نے کہا کہ پاکستان کے آئین میں تمام بانیوں نے وہی خط چیف جسٹس آف پاکستان کو بھیجا تھا۔اسد قیصر نے کہا کہ ان کی حکومت میں افغانستان کے ساتھ دوستانہ تعلقات تھے اور ایک بھی ڈرون حملہ نہیں ہوا تھا۔ انہوں نے کہا کہ خیبرپختونخوا کے مسائل امن و امان کی وجہ سے نہیں بلکہ غلط فارن پالیسی کی وجہ سے ہیں، اور تحریک انصاف کی حکومت نے افغانستان کے ساتھ تجارت کو فروغ دیا۔