عوامی مشکلات میں کمی اور معاشی اشاریے بہتری کی جانب گامزن ہیں: صدر مملکت

لاہور( اباسین خبر)صدر مملکت آصف علی زرداری نے کہا کہ عوام کی مشکلات کم ہو رہی ہیں اور معاشی اشاریے بہتری کی جانب گامزن ہیں۔آصف زرداری نے سابق گورنر پنجاب مخدوم احمد محمود کے اعزاز میں دیے گئے عشائیے میں شرکت کی۔ اس موقع پر گورنر پنجاب سردار سلیم حیدر خان، معروف بزنس مین گوہر اعجاز، نواب شہزاد سمیت اہم شخصیات بھی موجود تھیں۔تقریب سے خطاب کرتے ہوئے صدر مملکت نے ملک کی اقتصادی صورتحال اور حکومت کی اصلاحات پر روشنی ڈالی اور انتظامیہ کی کارکردگی میں مزید بہتری کی ضرورت پر زور دیا۔انہوں نے اپنے حالیہ چین کے دورے کے حوالے سے کہا کہ یہ کامیاب رہا اور سی پیک کی بنیاد رکھی گئی، جو خطے کی ترقی کے لیے اہم قدم ہے۔ چینی کمپنیاں پاکستان میں فیکٹریاں لگائیں گی۔آصف زرداری نے سندھ حکومت کے کاموں کو سراہتے ہوئے کہا کہ صحت اور تعلیم کے شعبوں میں قابلِ ذکر ترقی ہوئی ہے، نئی یونیورسٹیاں، کالجز اور ہسپتال قائم کیے گئے ہیں۔ سندھ میں سیلاب زدگان کے لیے گھروں کی تعمیر کی گئی ہے اور دیگر صوبوں کو بھی یہ اقدام اپنانا چاہیے۔