بلوچستان، سینیٹ کی خالی نشست پر صرف ایک امیدوار کے کاغذات نامزدگی جمع

کو ئٹہ ( اباسین خبر)بلوچستان سے سینیٹ کی خالی نشست پر ضمنی انتخاب کے لیے صرف ایک امیدوار، اسد قاسم رونجھو نے کاغذات نامزدگی جمع کروا دیے ہیں۔الیکشن کمیشن کے مطابق بلوچستان نیشنل پارٹی (بی این پی) کے مستعفی سینیٹر قاسم رونجھو کے بیٹے اسد قاسم نے کاغذات نامزدگی جمع کرائے ہیں۔ اسد قاسم کی تجویز بلوچستان عوامی پارٹی (بی اے پی) کے آغا احمد عمر احمد زئی نے کی، جبکہ تائید مسلم لیگ ن کے ولی محمد نورزئی نے کی۔صوبے کی سینیٹ کی خالی نشست پر 8 مارچ کو ہونے والے ضمنی انتخاب میں اس کے علاوہ کسی دوسرے امیدوار نے کاغذات نامزدگی جمع نہیں کرائے۔ اگر اسد قاسم کے کاغذات نامزدگی درست پائے گئے تو وہ بلامقابلہ سینیٹر منتخب ہو جائیں گے۔یاد رہے کہ بی این پی کے سربراہ سردار اختر جان مینگل نے 26 ویں آئینی ترمیم کے حق میں ووٹ دینے کے بعد قاسم رونجھو سے سینیٹ کی نشست سے استعفی طلب کیا تھا، جس کے بعد وہ 23 اکتوبر 2024 کو مستعفی ہو گئے تھے۔ قاسم رونجھو مارچ 2021 کے سینیٹ انتخابات میں بی این پی کی جانب سے منتخب ہوئے تھے۔