نیوزی لینڈ کے لوکی فرگوسن بھی چیمپئنز ٹرافی سے باہر

لاہور( سپورٹس ڈیسک)نیوزی لینڈ کے فاسٹ بولر لوکی فرگوسن آئی سی سی چیمپئنز ٹرافی سے باہر ہو گئے ہیں۔ فرگوسن کو وارم اپ میچ کے دوران پیر میں تکلیف ہوئی تھی، جس کے بعد نیوزی لینڈ کرکٹ کا کہنا ہے کہ میڈیکل پینل نے طے کیا ہے کہ فرگوسن چیمپئنز ٹرافی کے لیے فٹ نہیں ہو پائیں گے۔فرگوسن کی جگہ نیوزی لینڈ کے اسکواڈ میں کائل جیمیسن کو شامل کر لیا گیا ہے۔ کچھ دن قبل نیوزی لینڈ کے فاسٹ بولر بین سیئرز بھی آئی سی سی چیمپئنز ٹرافی سے باہر ہو چکے تھے، جو ہیم اسٹرنگ انجری کا شکار ہوئے تھے۔ایونٹ سے باہر ہونے والے کھلاڑیوں میں پاکستان کے صائم ایوب، بھارت کے جسپریت بمراہ، اور آسٹریلیا کے مچل اسٹارک بھی شامل ہیں۔ افغان اسپنر اے ایم غضنفر بھی فٹنس مسائل کی وجہ سے ٹیم کو دستیاب نہیں ہوں گے، جبکہ جنوبی افریقا کو فاسٹ بولر اینرک نورکیا کی خدمات حاصل نہیں ہوں گی۔چیمپئنز ٹرافی ٹورنامنٹ 19 فروری سے 9 مارچ تک پاکستان کی میزبانی میں کھیلا جائے گا۔