گورنر کے پی کا اسلام آباد انٹرنیشنل ایئرپورٹ کا نام بینظیر بھٹو سے منسوب کرنےکا مطالبہ

اسلام آباد( اباسین خبر)گورنر خیبرپختونخوا فیصل کریم کنڈی نے اسلام آباد انٹرنیشنل ایئرپورٹ کا نام بے نظیر بھٹو کے نام سے منسوب کرنے کا مطالبہ کیا ہے۔فیصل کریم کنڈی نے اس حوالے سے صدر مملکت آصف علی زرداری اور وزیرِ اعظم شہباز شریف کو خط لکھا۔ خط میں گورنر خیبرپختونخوا نے ذکر کیا کہ 21 جون 2008 کو اس وقت کے وزیرِاعظم نے ایئرپورٹ کا نام “بے نظیر بھٹو انٹرنیشنل ایئرپورٹ” رکھنے کا اعلان کیا تھا اور 17 جولائی 2008 کو سول ایوی ایشن اتھارٹی کی جانب سے اس پر باقاعدہ اعلامیہ بھی جاری کیا گیا تھا، لیکن اس پر عمل درآمد نہیں کیا گیا۔خط میں فیصل کریم کنڈی نے کہا کہ اسلام آباد ایئرپورٹ کا نام بے نظیر انٹرنیشنل ایئرپورٹ رکھنا، محترمہ بے نظیر بھٹو کی خدمات کو خراجِ تحسین پیش کرنے کا ایک اہم قدم ہوگا۔گورنر خیبرپختونخوا نے اپنے خط میں مزید کہا کہ پاکستان اور دیگر ممالک میں بھی قومی ہیروز کے نام پر ایئرپورٹس موجود ہیں، اس طرح کا اقدام شہید بے نظیر بھٹو کی قربانیوں کو یادگار بنائے گا۔انہوں نے اپنی درخواست میں صدر مملکت اور وزیرِاعظم سے استدعا کی ہے کہ عوامی مطالبے کو مدنظر رکھتے ہوئے متعلقہ حکام کو اس حوالے سے ہدایات جاری کی جائیں۔