کراچی: غیر قانونی تعمیرات، ایس بی سی اے و دیگر کو نوٹسز جاری

کراچی( اباسین خبر)سندھ ہائی کورٹ کے آئینی بینچ نے کراچی کے علاقے گلشنِ اقبال 13 ڈی میں غیر قانونی تعمیرات کے خلاف نجی ہاسنگ سوسائٹی ریذیڈنٹس ایسوسی ایشن کی درخواست پر سماعت کرتے ہوئے ایس بی سی اے اور دیگر فریقین کو نوٹسز جاری کر دیے۔سندھ ہائی کورٹ نے گلشنِ اقبال 13 ڈی میں غیر قانونی تعمیرات کے حوالے سے سماعت کے دوران درخواست گزار کے وکیل سے استفسار کیا کہ آپ نے یہ درخواست کیوں دائر کی ہے؟درخواست گزار کے وکیل نے عدالت کو بتایا کہ 3 پلاٹوں پر غیر قانونی تعمیرات ہو رہی ہیں۔ وکیل نے مزید بتایا کہ وہ خود اسی علاقے کے رہائشی ہیں اور پلان کی منظوری کے بغیر تعمیرات کی جا رہی ہیں۔ انہوں نے کہا کہ اس علاقے میں پہلے بھی خلاف ضابطہ کثیر المنزلہ عمارتیں تعمیر کی گئی ہیں، حالانکہ یہاں صرف رہائشی تعمیرات کی اجازت ہے۔