مخالفین پنجاب پر تنقید کر کے خبروں میں رہنے کی کوشش کرتےہیں: عظمیٰ بخاری

لاہور( اباسین خبر)صوبائی وزیر اطلاعات عظمی بخاری نے مشیر اطلاعات خیبرپختونخوا بیرسٹر سیف کے بیان پر ردعمل دیتے ہوئے کہا کہ بیرسٹر سیف ہمیشہ پنجاب پر تنقید کر کے خبروں میں زندہ رہنے کی بھونڈی کوشش کرتے ہیں۔عظمی بخاری نے کہا کہ بائیکر لین کا رنگ لوکل کمپنی نے ایک سال کی گارنٹی پر ٹیسٹ کے طور پر لگایا تھا اور وہی کمپنی دوبارہ بائیکر لین کا رنگ کرے گی۔ اس معاملے میں پنجاب حکومت کا کوئی نقصان نہیں ہوا اور نہ ہی کوئی ادائیگی کی گئی۔انہوں نے خیبرپختونخوا حکومت کو تنقید کا نشانہ بناتے ہوئے کہا کہ پشاور کی بی آر ٹی پچھلے پانچ سال میں کم چل سکی ہے اور زیادہ جلی ہے۔ پشاور میٹرو کے 60 ارب روپے ابھی بھی کے پی حکومت کو ادا کرنے ہیں، اور اس کا کیس ابھی بھی عدالت میں چل رہا ہے۔عظمی بخاری کا مزید کہنا تھا کہ “کے پی حکومت کے ترجمان نے کبھی بھی اپنے وزیراعلی کی کارکردگی قوم کو نہیں بتائی۔ کے پی میں آج بھی لوگ ندی نالوں سے ڈولیوں اور بائیکس کے ذریعے عبور کرتے ہیں۔”انہوں نے کہا کہ پنجاب میں میٹرو بس، اورنج ٹرین کے بعد ٹرام اور انڈرگرانڈ گرین لائن بنانے جا رہی ہے، اور یہ کام ان لوگوں کے لیے سبق ہے جن کی اپنی کارکردگی بتانے کے لائق نہیں ہے اور وہ دوسروں کے اچھے کاموں میں کیڑے نکالنے کی کوشش کرتے ہیں۔