گورنر کا ڈمپر حادثات پر وزیراعلیٰ کو خط، اعلیٰ سطح کا کمیشن بنانے کا مشورہ

کراچی( اباسین خبر) گورنر سندھ کامران خان ٹیسوری نے شہر میں بڑھتے ٹریفک حادثات پر وزیراعلی سندھ کو خط لکھ دیا۔ترجمان کے مطابق، گورنر سندھ کامران ٹیسوری نے ڈمپر، ٹرک اور واٹر ٹینکرز ڈرائیوروں کی لاپرواہ ڈرائیونگ پر تشویش کا اظہار کرتے ہوئے کہا کہ چند مہینوں میں ٹریفک قوانین کی خلاف ورزیوں اور حادثات میں نمایاں اضافہ ہوا ہے۔گورنر سندھ نے وزیراعلی کو چیف سیکرٹری کی سربراہی میں اعلی سطح کا کمیشن تشکیل دینے کا مشورہ دیا اور کہا کہ کمیٹی کو حادثات کی وجوہات کی نشاندہی کرنی چاہیے اور ذمہ داروں کا تعین کرنا چاہیے۔ اس کے علاوہ، آئندہ ایسے واقعات کی روک تھام کے لیے مثر حکمت عملی بنانے کی ضرورت پر زور دیا۔کامران ٹیسوری نے اپنے خط میں کہا کہ اس وقت عوام میں شدید بے چینی اور تحفظات پائے جا رہے ہیں، اور انہوں نے حکومت سے فوری اور مثر اقدامات کرنے کی استدعا کی تاکہ شہریوں کی قیمتی جانوں کا تحفظ یقینی بنایا جا سکے۔