مودی سرکار کے دور میں مسلمانوں کیخلاف نفرت انگیزی میں خطرناک اضافہ

واشنگٹن( مانیٹرنگ ڈیسک)عالمی رپورٹ کے مطابق مودی سرکار کے دور حکومت میں بھارت میں مسلمانوں کے خلاف نفرت انگیزی میں خطرناک حد تک اضافہ ہوا۔امریکی تھنک ٹینک کی رپورٹ کے مطابق بھارت میں مذہبی اقلیتوں کے خلاف نفرت انگیز اور اشتعال انگیز واقعات میں تیزی سے اضافہ ہوا ہے۔انڈیا ہیٹ لیب کی رپورٹ میں بتایا گیا کہ گزشتہ برس بھارت میں 1165 نفرت انگیز واقعات ریکارڈ کیے گئے، جو 2023 کے مقابلے میں 74.4 فیصد زیادہ تھے۔ ان میں سے 98.5 فیصد واقعات میں مسلمانوں کو ہدف بنایا گیا، جبکہ 80 فیصد واقعات بی جے پی کی حکومت والی ریاستوں میں پیش آئے۔واشنگٹن ڈی سی کے سینٹر فار دی سٹڈی آف آرگنائزڈ ہیٹ کی رپورٹ میں کہا گیا کہ بھارت میں نفرت انگیزی کا رجحان خاص طور پر ان ریاستوں میں بڑھ رہا ہے جہاں نریندر مودی کی بی جے پی اور ان کے اتحادیوں کی حکومت ہے۔