انسٹاگرام کا صارفین کے لیے اہم ایپ متعارف کرانے کا اعلان

کیلیفورنیا( مانیٹرنگ ڈیسک)حال ہی میں امریکا میں ٹِک ٹاک پر عائد کی جانے والی پابندی (جو بعد میں ختم کر دی گئی) نے اس ایپ کے صارفین کو صرف ٹِک ٹاک ہی نہیں بلکہ بائٹ ڈانس کی ویڈیو ایڈٹنگ ایپ کیپ کٹ تک رسائی سے بھی محروم کر دیا تھا۔ اس موقع پر میٹا نے تخلیق کاروں کے لیے اپنے نئے فری ویڈیو ایڈیٹر ایڈٹس کا اعلان کیا ہے۔ایڈٹس ایپ فی الحال امریکا میں پری آرڈر پر دستیاب ہے اور اس کے لائیو ہونے کا امکان آئندہ ماہ ہے۔ انسٹاگرام کے سربراہ ایڈم موسیری نے اس ایپ کا اینڈرائیڈ ورژن جلد متعارف کرانے کی تصدیق بھی کی ہے۔ایڈٹس ایپ کے ذریعے صارفین عمودی (ورٹیکل) اسٹائل ویڈیوز کے لیے فوٹیج کو عکس بند اور ایڈٹ کر سکیں گے۔ انسٹاگرام پر ویڈیوز پوسٹ کرنے پر ایپ ویوئر انگیجمنٹ جیسے لائیو پرفارمنس انسائٹس فراہم کرے گی۔اس ایپ میں وہ تمام فیچرز شامل ہیں جو کیپ کٹ میں پائے جاتے ہیں، جن میں گرین اسکرین، ویڈیو اوورلے، کیپشن جنریشن اور وائس اوورز شامل ہیں۔ اس کے علاوہ، ایپ میں موجود اے آئی اینیمیشن فیچر کا استعمال کرتے ہوئے صارفین تصاویر کو حرکت میں بھی لا سکتے ہیں۔