ٹرمپ نے دوسری بار سُپر پاور پر حکمرانی کا حلف اٹھا لیا

واشنگٹن( مانیٹرنگ ڈیسک)ڈونلڈ ٹرمپ نے امریکا کے 47 ویں صدر کے طور پر حلف اٹھا لیا۔امریکی سپریم کورٹ کے چیف جسٹس جان رابرٹس نے صدر ٹرمپ سے عہدے کا حلف لیا، جب کہ نائب صدر جے ڈی وینس نے بھی ڈونلڈ ٹرمپ کے ہمراہ اپنے عہدے کا حلف اٹھایا۔واشنگٹن ڈی سی میں شدید سردی کے باعث 40 سال بعد حلف برداری کی تقریب انڈور ہوئی۔ ڈونلڈ ٹرمپ کے حلف اٹھاتے ہی توپوں کی سلامی دی گئی۔امریکی میڈیا کے مطابق، تقریب سے پہلے ٹرمپ نے وائٹ ہاس میں صدر بائیڈن سے ملاقات کی، اور اہلیہ میلانیا ٹرمپ کے ساتھ واشنگٹن کے چرچ میں دعائیہ تقریب میں بھی شرکت کی۔ڈونلڈ ٹرمپ کی حلف برداری کی تقریب میں سبکدوش ہونے والے صدر جو بائیڈن، سابق صدور بل کلنٹن، جارج ڈبلیو بش، اور براک اوباما شریک ہوئے، جن کے ہمراہ ان کی بیویاں بھی تھیں، تاہم سابق خاتون اول مشیل اوباما تقریب میں شریک نہیں ہوئیں۔اس تقریب میں ٹیکسلا، ایکس اور سٹار لنک کے بانی ایلون مسک، گوگل کے سی ای او سندر پچائی، میٹا کے سی ای او مارک زکربرگ اور ٹک ٹاک کے سی ای او شو چیو بھی موجود تھے۔ حلف برداری سے قبل کیپٹل ون ایرینا میں ٹرمپ کی جیت کی خوشی میں ریلی نکالی گئی۔