پہلی بار زمین سے باہر کسی مقام کو غیرمحفوظ قرار دے دیا گیا

نیو یارک ( مانیٹرنگ ڈیسک)ورلڈ مونومینٹس فنڈ (ڈبلیو ایم ایف) نے پہلی بار زمین سے باہر کسی مقام کو غیر محفوظ قرار دے دیا ہے، اور چاند کو اپنی 2025 واچ لسٹ میں شامل کیا ہے۔ ڈبلیو ایم ایف ایک بین الاقوامی غیر منافع بخش تنظیم ہے جو ہر دو سال بعد 25 ثقافتی ورثہ کے خطرے سے دوچار مقامات کی نشاندہی کرتی ہے۔یہ فیصلہ چاند پر انسانیت کی موجودگی سے متعلق 90 سے زیادہ تاریخی مقامات کی موجودگی کی بنیاد پر کیا گیا ہے، جن میں “Tranquility Base” بھی شامل ہے، جہاں نیل آرمسٹرانگ نے پہلی بار چاند پر قدم رکھا تھا۔ اس لینڈنگ سائٹ پر خلاباز کے جوتوں کے پرنٹس اور اپولو 11 مشن کے 100 سے زیادہ دیگر نمونے محفوظ ہیں۔ڈبلیو ایم ایف کی صدر اور سی ای او، بینیڈیکٹ ڈی مونٹلر نے کہا کہ چاند پر موجود یہ تاریخی مقامات انسانیت کے پہلے قدموں کی گواہی دیتے ہیں اور ان کی حفاظت کی فوری ضرورت ہے۔