پاکستان کا مقامی ای او ون سیٹلائٹ کل لانچ کرنے کا اعلان

کراچی( مانیٹرنگ ڈیسک) پاکستان کے اسپیس اینڈ اپر ایٹموسفیر ریسرچ کمیشن (سپارکو) نے اپنے مقامی الیکٹرو آپٹیکل سیٹلائٹ (EO-1) کو 17 جنوری کو لانچ کرنے کا اعلان کیا ہے۔ یہ سیٹلائٹ کئی اہم مقاصد کے لیے ڈیزائن کیا گیا ہے، جن میں قدرتی وسائل کی نگرانی، زراعت کی بہتری، شہری منصوبہ بندی، اور ڈیزاسٹر ریسپانس شامل ہیں۔پاکستان کے خلائی ادارے کے ترجمان نے بتایا کہ EO-1 سیٹلائٹ کا مقصد خوراک کی حفاظت، پانی کے انتظام کو یقینی بنانا، اور ملک بھر میں قدرتی وسائل کی بہتر نگرانی کرنا ہے۔ یہ سیٹلائٹ پاکستان کے خلائی پروگرام میں ایک اہم سنگ میل ثابت ہوگا اور اس کی ٹیکنالوجی میں مزید ترقی کی راہ ہموار کرے گا۔یہ مشن پاکستان کے خلائی پروگرام کو مزید مضبوط کرے گا اور اس سے ملک کو اہم ڈیٹا فراہم ہو گا جس کا استعمال مختلف شعبوں میں کیا جا سکے گا، جیسے کہ زراعت اور شہری منصوبہ بندی۔اس سے قبل، مئی 2024 میں پاکستان کا پہلا ملٹی مشن سیٹلائٹ “پاک سیٹ ایم ایم ون” چین کے Xichang سیٹلائٹ لانچ سینٹر سے لانچ کیا گیا تھا۔