پاکستان کو واپس آئینی فریم میں لانے کیلئےقومی کیئرسیٹ اپ بنایا جائے، محمود اچکزئی

کو ئٹہ ( اباسین خبر)محمود خان اچکزئی نے ایک نجی ٹی وی چینل سے بات کرتے ہوئے 2024 کے انتخابات کے نتائج کو پاکستان کی تاریخ کے سب سے “بوگس” اور “ناروا” انتخابات قرار دیا۔ ان کا کہنا تھا کہ عمران خان نے یہ الیکشن جیتا تھا، مگر کچھ قوتوں کی مداخلت سے نتائج تبدیل کر دیے گئے، جو پاکستان کے ساتھ سنگین جرم ہے۔ انہوں نے کہا کہ ایسے فیصلوں پر ملوث افراد کو معافی مانگنی چاہیے اور پیچھے ہٹنا چاہیے۔اچکزئی نے مزید کہا کہ پاکستان میں آئین کی پامالی ہو رہی ہے اور جمہوریت کو خطرات لاحق ہیں۔ ان کے مطابق، پاکستان میں مختلف قومیں اور زبانیں ایک آئینی فریم ورک کے تحت اکٹھی رہتی ہیں، اور یہی آئین ہی ہے جو ملک کو یکجا رکھتا ہے۔ انہوں نے کہا کہ جمہوریت اور آئین کی خلاف ورزی کرنے والوں کو سخت سزائیں ملنی چاہئیں۔انہوں نے تجویز دی کہ پاکستان کو آئینی فریم ورک میں واپس لانے کے لیے ایک قومی حکومت بنائی جائے جس میں تمام سیاسی جماعتیں شامل ہوں، اور اس حکومت کا مقصد صاف، شفاف انتخابات کا انعقاد ہو۔ وہ چاہتے ہیں کہ پاکستان کے تمام سٹیک ہولڈرز، بشمول صحافیوں، ججز، ماہرین اقتصادیات اور دیگر اہم شخصیات، مل کر ملکی مسائل کا حل تلاش کریں۔اچکزئی نے کہا کہ اگر ملک کو آئینی بحران، سیاسی، معاشی اور اخلاقی مسائل سے نکالنا ہے تو تمام قوم کو متحد ہو کر ملکی ترقی کے لیے کام کرنا ہوگا۔ انہوں نے ایک مرتبہ پھر دعوی کیا کہ اگر یہ صورتحال جاری رہی تو عوام کو سڑکوں پر آنا ہوگا اور ملک کی تقدیر بدلنے کے لیے احتجاج کرنا ہوگا۔محمود خان اچکزئی نے بالآخر کہا کہ اگر ملک میں انصاف اور آئین کی حکمرانی قائم نہ ہو تو عوام کے پاس سڑکوں پر نکل کر اپنی آواز بلند کرنے کے علاوہ کوئی اور راستہ نہیں ہوگا۔