سائنس دانوں نے بلیک ہول کے قریب کیا دریافت کرلیا؟

نیو یارک ( مانیٹرنگ ڈیسک)سائنس دانوں کا کہنا ہے کہ ہماری کہکشاں کے مرکز میں موجود ایک بہت بڑے بلیک ہول کے اطراف میں ممکنہ طور پر سیارے موجود ہو سکتے ہیں۔ اس دریافت کی بنیاد اس وقت رکھی گئی جب سائنس دانوں نے سیگیٹیریس اے* نامی بلیک ہول کے قریب پہلا بائنری ستارہ دریافت کیا۔یہ دریافت نہ صرف بلیک ہول کے قریب ستاروں کی موجودگی کو ظاہر کرتی ہے بلکہ اس سے یہ بھی ثابت ہوتا ہے کہ اس علاقے میں سیاروں کی موجودگی ممکن ہو سکتی ہے۔ ماضی میں سائنس دانوں کا یہ خیال تھا کہ بلیک ہول کے قریب سیاروں کا وجود مشکل ہو سکتا ہے، تاہم یہ نئی معلومات اس خیال کو چیلنج کرتی ہیں۔سائنس دانوں کا خیال ہے کہ اس بلیک ہول کے قریب نامعلوم سیارے بھی موجود ہو سکتے ہیں۔ مستقبل میں ویری لارج ٹیلی اسکوپ اور ایکسٹریملی لارج ٹیلی اسکوپ جیسے جدید آلات کی مدد سے ان سیاروں کو دریافت کرنا ممکن ہو سکتا ہے۔ یہ نئی معلومات خلا میں زندگی اور سیاروں کے وجود کے حوالے سے نئے دروازے کھول سکتی ہیں۔