موسیقار رشید عطرے کو مداحوں سے بچھڑے 57 برس بیت گئے

لاہور( شو بز ڈیسک)لازوال گیتوں کے تخلیق کار رشید عطرے کو مداحوں سے بچھڑے 57 برس بیت گئے۔رشید عطرے 15 فروری 1919 کو امرتسر میں ہارمونیم نواز خوشی محمد کے گھر پیدا ہوئے۔ انہوں نے محض 48 برس کی زندگی میں موسیقی کی دنیا میں اپنا ایسا مقام بنایا جو آج بھی یاد رکھا جاتا ہے۔1950 میں رشید عطرے کی موسیقی میں ترتیب دیا گیا گیت بھاگاں والیو نام جپو مولا نام نے انہیں فلمی صنعت میں ایک شاندار موسیقار کے طور پر متعارف کرایا۔ اس کے بعد ان کی ترتیب دی ہوئی موسیقی میں کئی خوبصورت گیت شامل ہوئے جو آج بھی اپنی سحر انگیزی برقرار رکھے ہوئے ہیں۔رشید عطرے کی فنی مہارت نے فلم زرقا کے گیتوں کو ایسا دوام بخشا کہ ان کے رنگ آج بھی مدھم نہیں پڑے۔اپنے کیریئر میں رشید عطرے نے 48 اردو اور 7 پنجابی فلموں کی موسیقی ترتیب دی۔ وہ 18 دسمبر 1967 کو لاہور میں انتقال کر گئے۔